Poslovne vijesti - Makedonija

Општините ќе се развиваат со зелени инвестиции

Општините и Владата ќе основаат зелени индустриски зони. Инвестициите во овие зони ќе придонесат за раст на индустријата и економијата, ќе ја заштитат животната средина и ќе отворат нови работни места.

Ова го предвидува Предлог-законот за индустриски зелени зони којшто влезе во собраниска процедура.

Според предлагачот на законот, Министерството за економија, инвеститорите ќе добијат можност за инвестиции во нови области, а земјиштето ќе можат да го откупат по едно евро за квадратен метар. Целата инфраструктура ќе биде обезбедена од локалната самоуправа и Владата.

- Основни цели со донесувањето на овој закон е со формирање на вакви зони во општините да се овозможи привлекување на странски инвестиции, подобрување на бизнис климата и економската перспектива што ќе овозможи отворање на нови работни места. На овој начин се очекува да се овозможи поддршка на економскиот раст и развој на локалната самоуправа, зголемување на вработеноста преку отварање на нови работни места со што ќе се подобри конкурентноста на граѓаните и нивниот животен стандард - велат од Министерството за економија.

Според предлог-законот основач на индустриска зелена зона може да биде локалната самоуправа којашто како оператор ќе има јавно претпријатие основано во рамки на општината и Владата која ќе управува со зоната преку Дирекцијата за технолошки индустриски развојни зони. Корисници на зоната можат да бидат домашни и странски компании кои во зелените зони нема да имаат посебни поволности.

Според законот Владата може да биде основач на зелена зона доколку површината на парцелата е над 150 хектари. Како дејности што може да се вршат во зелените зони се лесна и незагадувачка индустрија.

При тоа ќе се води регистар на индустриски зелени зони, а добивањето на дозволата за градба ќе се одвива на брз и транспарентен начин со оглед на тоа што веќе од први јуни постапката се спроведува по електронски пат. Ако основач на зоната е општината, тогаш таа и ќе го отуѓува земјиштето, а ако основач е Владата, тогаш надлежно за закуп на градежна парцела надлежно ќе биде Министерството за транспорт и врски.

Според законското решение компаниите што ќе работат во зоните ќе бидат должни да доставуваат годишен извештај за работењето, а тој ќе треба да содржи информации за обемот на услугите остварени во зоната, вкупен приход, и број на отворени работни места. Ако не ја извршат оваа обврска најдоцна до 15 април секоја година, компаниите ќе се соочат со казна од 4.000 до 5.000 евра, а правното лице во компанијата ќе биде казнето со глоба од 500 до 1.000 евра.